இனியவை நாற்பது (31-35)-பாடல்களும் விளக்கமும்

பூதன் சேந்தனார் என்பவர் இயற்றிய நூல் இனியவை நாற்பது. இது நாற்பது வெண் பாக்களினால் ஆனது. பண்டைக் காலத் தமிழ்நூல் தொகுப்புக்களில் ஒன்றான பாத்தேன் கீழ் கணக்கு நூல்களுள் இதுவும் ஒன்று. உலகில் நல்ல அல்லது இனிமையான விடயங்களை எடுத்துக் கூறுவதன் மூலம் மக்களுக்கு நீதி புகட்டுவதே இந்நூலின் நோக்கம். ஒவ்வொரு பாடலும் மூன்று நல்ல விடயங்களை எடுத்துக் கூறுகின்றது. 

இனியவை நாற்பது பாடல்கள் (31-35) விளக்கத்துடன்:

இனியவை நாற்பது- பாடல்: 31

அடைந்தார் துயர் கூரா ஆற்றல் இனிதே;

கடன் கொண்டும் செய்வன செய்தல் இனிதே;

சிறந்து அமைந்த கேள்வியர் ஆயினும், ஆராய்ந்து

அறிந்து உரைத்தல் ஆற்ற இனிது. 31

பொருள்:- கூரா - துன்பம்;
தம்மை அடைக்கலமாக வந்தவன் துன்பத்தை நீக்குவது இனிது. கடன் வாங்கியாவது செய்ய வேண்டியவற்றைச் செய்வது இனிது. மிகச் சிறந்த நுட்பமான அறிவுடையவர்களாக இருந்தாலும் ஒரு பொருளை ஆராய்ந்து உரைப்பது இனிது ஆகும்.

***************************************

இனியவை நாற்பது-பாடல்: 32

கற்று அறிந்தார் கூறும் கருமப் பொருள் இனிதே;

பற்று அமையா வேந்தன்கீழ் வாழாமை முன் இனிதே;

தெற்றெனவு இன்றித் தெளிந்தாரைத் தீங்கு ஊக்காப்

பத்திமையின் பாங்கு இனியது இல். 32

பொருள்:- தெற்றனவு - ஆராய்ந்து;
கற்று அறிந்தவர்கள் கூறும் கருமப் பயன் இனிதாகும். அன்பில்லாத அரசனின் கீழ் வாழாதிருத்தல் இனிதாகும். ஆராயாமல் கெடுதல் செய்தவர்களுக்கு தீங்கு செய்யாமல் அன்புடையவராக இருத்தலைப் போன்று இனியது வேறு இல்லை.

***************************************

இனியவை நாற்பது- பாடல்: 33
ஊர் முனியா செய்து ஒழுகும் ஊக்கம் மிக இனிதே;
தானே மடிந்து இராத் தாளாண்மை முன் இனிதே;
வாள் மயங்கு மண்டு அமருள் மாறாத மா மன்னர்
தானை தடுத்தல் இனிது. 33

பொருள்:- தாள் - முயற்சி;
ஊர் வெறுக்காதவற்றைச் செய்து வருபவனின் ஊக்கம் இனிதாகும். சோம்பல் இல்லாது முயற்சி உடையவனின் ஆண்மை இனிதாகும். வாள் கலக்குகின்ற போரில் மாறாத பெருமை உடைய அரசர்களின் படைகளை எதிர்த்தல் ஓர் அரசனுக்கு இனிதாகும்.

***************************************

இனியவை நாற்பது- பாடல்: 34

எல்லிப் பொழுது வழங்காமை முன் இனிதே;

சொல்லுங்கால் சோர்வு இன்றிச் சொல்லுதல் மாண்பு இனிதே;

புல்லிக் கொளினும் பொருள் அல்லார் தம் கேண்மை

கொள்ளா விடுதல் இனிது. 34

பொருள்:- கேண்மை - நட்பு; சோர்வு - மந்தி;
இரவில் செல்லாமல் இருப்பது இனியது. சொல்லும் இடத்து மறதியின்று சொல்லுதல் இனிதாகும். தானாக வலிய வந்து நட்புக் கொள்ளும் கயவர்களின் நட்பினைக் கைவிடுதல் இனிதாகும்.

***************************************

இனியவை நாற்பது- பாடல்: 35

ஒற்றினான் ஒற்றிப் பொருள் தெரிதல் மாண்பு இனிதே;
முன்தான் தெரிந்து முறை செய்தல் முன் இனிதே;
பற்று இலனாய்ப் பல்லுயிர்க்கும் பார்த்து உற்றுப் பாங்கு
அறிதல் வெற்றி வேல் வேந்தர்க்கு இனிது. 35 

பொருள்:ஒற்று - வேவு; உற்று - சமமாக;
வெற்றியைத் தருகின்ற பெருமை உடைய அரசன் ஒற்றன் கூறியவற்றை, வேறு ஒற்றராலே ஆராய்ந்து பார்ப்பது இனிது. ஆராய்ந்து பார்த்து நீதி வழங்குதல் இனிதாகும். எல்லா உயிர்களையும் சமமாகப் பாவித்து முறை செய்தல் இனிதாகும்
***************************************

நாம் வளம் பெற,  நலம் பெற, மன நிறைவுடன் வாழ நாம் செய்யக் வேண்டியவைகளைப் பற்றி கூறும் பூதன் சேந்தன் என்னும் புலவர் இயற்றியது, இனியவை நாற்பது என்னும் நூல். பதினெண் கீழ் கணக்கின் தொகுப்பில் உள்ள இந்த நீதி நூலை நமது வாழ்க்கையில் பின்பற்றி வளமுடன் வாழ்வோமாக!!! மேலும் இனியவை  நாற்பதின் ஊடாக  பயணிப்போம் இனிய நண்பர்களே!!! அன்புடன் கே எம் தர்மா.