இனியவை நாற்பது (26-30)-பாடல்களும் விளக்கமும்

பூதன் சேந்தனார் என்பவர் இயற்றிய நூல் இனியவை நாற்பது. இது நாற்பது வெண் பாக்களினால் ஆனது. பண்டைக் காலத் தமிழ்நூல் தொகுப்புக்களில் ஒன்றான பாத்தேன் கீழ் கணக்கு நூல்களுள் இதுவும் ஒன்று. உலகில் நல்ல அல்லது இனிமையான விடயங்களை எடுத்துக் கூறுவதன் மூலம் மக்களுக்கு நீதி புகட்டுவதே இந்நூலின் நோக்கம். ஒவ்வொரு பாடலும் மூன்று நல்ல விடயங்களை எடுத்துக் கூறுகின்றது. 
***************************************************************** 

இனியவை நாற்பது பாடல்கள் (26-30) விளக்கத்துடன்:

இனியவை நாற்பது- பாடல்:26

நச்சித் தற் சென்றார் நசை கொல்லா மாண்பு இனிதே;

உட்கு இல்வழி, வாழா ஊக்கம் மிக இனிதே;

எத் திறத்தானும் இயைவ கரவாத

பற்றினில் பாங்கு இனியது இல். 26

பொருள்:- நசை - விருப்பம்; பாங்கு - அன்பு;
ஒரு பொருளை விரும்பித் தன்னை அடைந்தவர்களின் விருப்பத்தை நிறைவேற்றுதல் இனிது. மதிப்பு இல்லாதவிடத்து வாழாதவனின் மனவெழுச்சி இனிது. எப்படியானாலும் பிறருக்குக் கொடுக்கும் பொருளை மறைக்காதவனின் அன்பு மிகப்பெரியது.

********************************

இனியவை நாற்பது-பாடல்:27

தானம் கொடுப்பான் தகை ஆண்மை முன் இனிதே;

மானம் பட வரின் வாழாமை முன் இனிதே;

ஊனம் கொண்டாடார், உறுதி உடையவை

கோள் முறையால் கோடல் இனிது. 27

பொருள்:- ஆண்மை - பெருமை;
அபயம் கொடுப்பவனின் ஆண்மை மிக இனிது. மானம் இழந்து வாழாமை இனிது. குற்றம் கூறாதவரின் உறுதி இனிது. நன்மையானவற்றை முறைப்படிப் பெறுதல் இனிது.

********************************

இனியவை நாற்பது- பாடல்:28

ஆற்றானை, 'ஆற்று' என்று அலையாமை முன் இனிதே;

கூற்றம் வரவு உண்மை சிந்தித்து வாழ்வு இனிதே;

ஆக்கம் அழியினும், அல்லவை கூறாத

தேர்ச்சியில் தேர்வு இனியது இல். 28

பொருள்:- ஆற்றானை - செய்யமாட்டாதவனை; கூற்றம் - எமன்;
ஒரு வேலையைச் செய்யத் தெரியாதவனிடத்து ஒரு வேலையைக் கொடுக்காமை இனிது. எமனின் வருகையை எதிர்பார்த்து வாழ்வது இனிது. செல்வம் இழந்தாலும் பாவச் சொற்களைக் கூறாதிருப்பது எல்லாவற்றையும் விட இனியது.

********************************

இனியவை நாற்பது- பாடல்:29

கயவரைக் கை இகந்து வாழ்தல் இனிதே;

உயர்வு உள்ளி ஊக்கம் பிறத்தல் இனிதே;

'எளியர், இவர்!' என்று இகழ்ந்து உரையாராகி,

ஒளி பட வாழ்தல் இனிது. 29

 

பொருள்:-  கயவரை - கீழ்மக்களை; இகழ்ந்து - அவமதித்து;
கீழ் மக்களை நீக்கி வாழ்தல் இனியது. தன் உயர்வினை நினைத்து ஊக்கத்துடன் வாழ்தல் இனிது. வறியவர் என்று இகழாது புகழ்பட வாழ்தல் இனிதாகும்.

********************************

இனியவை நாற்பது-பாடல்:30

நன்றிப் பயன் தூக்கி வாழ்தல் நனி இனிதே;

மன்றக் கொடும்பாடு உரையாத மாண்பு இனிதே;

'அன்று அறிவார் யார்?' என்று அடைக்கலம் வெளவாத

நன்றியின், நன்கு இனியது இல். 30

பொருள்:- மாண்பு - மாட்சிமை; வௌவாத - அபகரியாத;
ஒருவர் செய்த உதவியினை நினைத்து வாழ்தல் இனிது. நீதி சபையில் நடுநிலை தவறாமல் இருத்தலின் பெருமை இனிது. யாருக்கும் தெரியாது என்று அடைக்கலமாய் வந்த பொருளை அபகரிக்காமல் இருத்தல் இனிதின் இனிது.

************************************

நாம் வளம் பெற,  நலம் பெற, மன நிறைவுடன் வாழ நாம் செய்யக் வேண்டியவைகளைப் பற்றி கூறும் பூதன் சேந்தன் என்னும் புலவர் இயற்றியது, இனியவை நாற்பது என்னும் நூல். பதினெண் கீழ் கணக்கின் தொகுப்பில் உள்ள இந்த நீதி நூலை நமது வாழ்க்கையில் பின்பற்றி வளமுடன் வாழ்வோமாக!!! மேலும் இனியவை  நாற்பதின் ஊடாக  பயணிப்போம் இனிய நண்பர்களே!!! அன்புடன் கே எம் தர்மா.