சிவவாக்கியம் (476-480) - சித்தர் சிவவாக்கியர் & திருமழிசையாழ்வார்

சிவவாக்கியம் (476-480)

 சித்தர் சிவ வாக்கியர் & திருமழிசையாழ்வார்
அரியும் சிவனும் ஒன்றே!!!
அறிந்தால் வாழ்வும் நன்றே !!!

சித்தர் சிவவாக்கியம் -476

உறங்கிலென் விழிக்கிலென் உணர்வு சென்று ஒடுங்கிலென்
திரும்பிலென் திகைக்கிலென் சில திசைகள் எட்டிலென்
புறம்புமுள்ளும் எங்ஙணும் பொதிந்திருந்த தேகமாய்
நிறைந்திருந்த ஞானிகள் நினைப்பது ஏதுமில்லையே.                        

உறங்குவது எது? விழிப்பது எது? உணர்வு சென்று ஒடுங்குவது எங்கு? திரும்பிப் பார்ப்பது எது? திகைப்பு ஏற்படுவது எது? திசைகள் எட்டும் எட்டான அகாரமாக நிற்பது எது, என்பதை அறிந்து கொண்டு அது மெய்ப்பொருளே என்பதனை உணர்ந்து கொண்டு அதிலேயே தங்கள் உடம்பில் வெளியாகவும் உள்ளத்தின் உள்வெளியான மனமாகவும் பொருத்தி சூட்சம தேகத்திலேயே நினைவை நிறுத்தி தியானித்திருக்கும் ஞானிகள் இறைவனைத் தவிர வேறு ஒன்றை நினைப்பது இல்லை. 
 
***************************************************
சித்தர் சிவவாக்கியம் -477

அங்கலிங்கம் பூண்டு நீரகண்ட பூசை செய்கிறீர்
அங்கலிங்கம் பூண்டு நீரமர்ந்திருந்த மார்பரே
எங்குமோடி எங்குமெங்கும் ஈடழிந்து மாய்கிறீர்
செங்கல் செம்பு கல்லெலாஞ் சிறந்து பார்க்கும் மூடரே.
 
உங்களுக்குள் இருக்கும் ஆத்மலிங்கத்தை உணராமல், உங்கள் அங்கத்தில் லிங்கத்தை மாலையாகக் கட்டி அதை மார்பில் அணிந்து கொண்டு நீங்கள் மிகவும் பிரம்மாண்டமாக சிவபூசை செய்கிறீர்கள். ஈசன் எங்கெங்கெல்லாம் கோயில் கொண்டிருக்கின்றான் என்பதை அறிந்து எல்லாத் தலங்களும் ஓடியோடி வணங்கித் தேடுகின்றீர்கள். உங்கள் உடலுக்குள்ளே கட்டாத லிங்கமாய் ஈசன் இருப்பதை அறியாமல் எங்கும் அலைந்து ஈசனைக் காணாமல் ஈடில்லா உயிரை இழக்கின்றீர்கள். செங்கல்லால் ஆன சுதைகளிலும், செம்பு, கருங்கல்லால் செய்த சிலைகளிலும் சிவன் இருக்கின்றான் என்று சிறப்பாக சொன்ன நூல்களை எல்லாம் ஆராய்ந்து அங்கெல்லாம் சென்று பார்க்கின்றீர்கள். உங்கள் அங்கத்திலேயே அவன் லிங்கமாகி நிற்பதை ஆராய்ந்து பார்க்காத மூடர்களே! 
        

****************************************************
சித்தர் சிவவாக்கியம் -478
தீட்டந்தீட்டமென்று நீர் தினமுழுகும் மூடரே
தீட்டமாகி யல்லவோ  திரண்டு காய மானதும்
பூட்டகாயமும்முளே புகழுகின்ற பேயரே
தீட்டு வந்து கொண்டாலோ தெளிந்ததே சிவாயமே.
.                         

எதெற்கெடுத்தாலும் தீட்டு தீட்டு என்று கூறிக் கொண்டு தினமும் நீரில் மூழ்கி குளித்துவிட்டு ஆச்சாரமாக இருப்பதாக சொல்லும் மூடர்களே! தீட்டினால் தானே உயிர் உருவாகி உடம்பு திரண்டு உண்டாகியுள்ளது. அதே தீட்டில் பூடகமாக பொருந்தியிருக்கும் சூட்சம உடம்பையும் மெய்ப் பொருள் உண்மையையும் உணர்ந்து அந்த ஒன்றையே பேணிப் புகழ்ந்து இருக்கும் பேயர்களான ஞானிகள், தீட்டாக வந்து நின்ற அதற்குள்ளேயே தியானித்திருந்து தெளிந்து கண்ட சோதியே சிவம் என்பதை அறிந்து அடைவார்கள்.

                
***************************************************
சித்தர் சிவவாக்கியம் - 479
மூல நாடி நம்முள்ளே முளைத்தெழுந்த வாயுவை
நாளு நாளும் உம்முளே நடுவிருத்த வல்லிரேல்
பாலனாகும் உம்முடல் பறந்து போகலாய் விடும்
ஆலமுண்ட கண்டர் பாதம் அம்மை பாதம் உண்மையே.      

வாசி யோகத்தினால் மூலாதாரத்தில் குண்டலினி சக்தியாக உறங்கிக் கொண்டிருக்கும் தனஞ்செயன் வாயுவை எழுப்பி சுழுமுனை நாடியில் செலுத்தி தியானம் செய்யுங்கள். ஒவ்வொரு நாளும் இதை உங்களுக்குள் வைராக்கியமாக இருந்து அப்பியாசித்து உம்மில் நடுவாக இருக்கும் மெய்ப்பொருளில் வாசியை இருத்தி நிறுத்தி நினைத்து தியானித்து ஞானத்தில் வல்லாராகுங்கள். அதனால் உங்கள் உடம்பு வஜ்ர தேகமாகி இளமையாகவே இருக்கும். ககன மார்க்கத்தில் பறவை போல் பறந்து போகும் சித்து கிடைக்கும். இது ஆலகால விஷம் உண்ட நீலகண்டர் பாதமாகவும் அகிலத்தையே ஆளும் அம்மையின் பாதமாகவும் நம்முள் இருக்கும் மெய்ப்பொருளே என்பதை உணர்ந்து தியானியுங்கள், இது உண்மையாகும்.          

***************************************************
சித்தர் சிவவாக்கியம் - 480
உந்தி மேலே நாலும் மூன்றும் ஓம் நமசிவாயமாம்
சந்தி சந்தி யென்று நீர் சாற்றுகின்ற பேயரே
முந்த வந்து நம்முளே மூலநாடி யூடுபோய்
அந்தி சந்தி அற்றிடம் அறிந்துணர்ந்து பாருமே.             

உந்தி என்ற உங்கள் தீயாக உலாவும் சோதிக்கு மேல் உள்ள மனம், புத்தி, சித்தம், அகங்காரம் என்பவை நான்கு வேத வாசல்களாகவும் அதற்குள் உள்ள முக்கோண வட்டங்களாகியதில் அறிவு, உணர்வு, நினைவு என்ற மூன்றும் சேர்ந்திருப்பதுவே ஓம் நமசிவாயமாக அமைந்துள்ளது. இதனை அறிந்து கொண்டு அந்தி சந்தி கூடும் நேரங்களில் சந்தியாவந்தணம் செய்து ஓம் நமசிவாய சிவாயநம ஓம் என்று சாற்றி தியானம் செய்யும் பேயரென்ற ஞானிகளே ஆதியாக வந்ததும் அனாதியாய் நின்றதும் ஆன மெய்ப்பொருளை உங்களில் கண்டு அந்த மூலநாடியான சுழுமுனையில் வாசியை செலுத்தி இராப்பகல் இல்லாத இடத்தில் மௌனமுற்று இவ்வுண்மையை அறிந்து உணர்ந்து தவத்தில் இருந்து பாருங்கள்.                    
***************************************************
http://sivavakiyar.blogspot.com/ நண்பர்களே லிங்கினை அழுத்தி சித்தர் சிவவாக்கியரின் சிந்தனை மற்றும் சிவனைப் பற்றிய 550 பாடல்களை இனிய சந்தத்தில் வேண்டும் பொழுது கேளுங்கள்.  மனதிற்கு மகிழ்வாக இருக்கும். 
மேலும் பயணிப்போம் சித்தர் சிவவாக்கியரின் சிந்தனைகளைத் தொடர்ந்து, பாட்டுச் சித்தரின் அருளாசியுடன். ..அன்புடன் கே எம் தர்மா.
ஓம் நமசிவய நமசிவய ஓம்!!