சிவவாக்கியம் (321-325) - சித்தர் சிவவாக்கியர் & திருமழிசையாழ்வார்

சிவவாக்கியம் (321-325)

 சித்தர் சிவ வாக்கியர் & திருமழிசையாழ்வார்
அரியும் சிவனும் ஒன்றே!!!
அறிந்தால் வாழ்வும் நன்றே !!!

சித்தர் சிவவாக்கியம் -321
உதித்த மந்திரத்திலும் ஒடுங்கும் அக்கரத்தினும்
மதித்த மண்டலத்திலும் மறைந்து நின்ற சோதி நீ
மதித்த மண்டலத்துளே மரித்து நீர் இருந்த பின்
சிரித்த மண்டலத்துளே சிறந்ததே சிவாயமே.    

அஞ்செழுத்து மந்திரத்தால் உதித்த உடம்பினுள் ஒரேழுத்தாகி ஒடுங்கி யாவரும் மதிக்கும் இடமாகிய சூரிய மண்டலத்தில் மறைந்து நின்று இருக்கும் சோதியே ஈசனாகிய நீ. அந்த மதித்த மண்டலமாகிய சூரியனுக்குள்ளேயே அறிவு, உணர்வு, மனம் ஆகிய மூன்றையும் இணைத்து ஒடுக்கி செத்தாரைப் போல் ஒன்றி தியானத்தில் இருந்தால், சிற்றம்பலம் ஆகிய சிகாரமான அக்னி மண்டலத்தில் உள்ளே சோதியாக விளங்கி சிறந்திருந்த அது சிவம் என்பதைக் கண்டு தெளிந்து சேருங்கள். 

***************************************************
சித்தர் சிவவாக்கியம் -322

திருத்தி வைத்த சர்குருவைச் சீர் பெற வணங்கிலீர்
குருக்கொடுக்கும் பித்தரே கொண்டு நீந்த வல்லிரே
குருக்கொடுக்கும் பித்தரும் குருக்கொள் வந்த சீடனும்
பருத்தி பட்ட பாடித்தான் பன்னிரெண்டும் பட்டதே.
 
எங்கெல்லாமோ அலைந்தும் திரிந்தும் ஆசைக்கடலில் வீழ்ந்தும் பழி பாவங்களுக்கும் ஆளாகியும் இருந்த இப்பிறவியை திருத்தி அறிவை அறிய வைத்து உண்மையை உணர வைத்து இறை சொரூபத்தை நமக்குள் காட்டிய சற்குருவை சீர் பெற வணங்குங்கள். அவ்வாறு உண்மை குரு உபதேசிக்கும் மெய்ஞானத்தை உணர்ந்து யோக தியானம் செய்து இப்பிறவிக் கடலை நீந்தி கடந்து இறைவனடி சேர வாருங்கள். குரு கற்றுக் கொடுத்த வண்ணம் சாதகம் செய்து பித்தராகிய சிவனை தனக்குள் குருவாக உள்ளதை அறிந்து சீவனையும் சிவனையும் ஒன்றிணைத்து தியானியுங்கள். பருத்தி பஞ்சானது பலபாடுகள்பட்டு ஆடை ஆவது போல ஒவ்வொரு அனுபவங்களையும் கடந்து மெய்நிலை அடைந்து ஈசனைச் சேருங்கள்.   

 
****************************************************
சித்தர் சிவவாக்கியம் -323
விழித்த கண் துதிக்கவும் விந்து நாத ஓசையும்
மேருவும் கடந்த ஆண்ட கோலமுங் கடந்து போய்
எழுத்தெலாம் அழிந்துவிட்ட இந்திரஞால வெளியிலே
யானும் நீயுமே கலந்த தென்ன தன்மை ஈசனே.

தியானத்தில் இருந்து விழித்த கண்கள் உன்னையே துதித்திருந்தது. அங்கே விந்துவாகிய ஒளியும் நாதமாகிய ஒலியும் கலந்து நின்று பிரணவ ஓசை கேட்டது. மனம் மேரு எனும் சகஸ்ரார தளத்தையும் கடந்து அண்டங்கள் கோளங்கள் என யாவையும் கடந்து போய் மோனமாகிய எழுத்தெல்லாம் அழிந்துவிட்ட இந்திர ஞால வெளியிலே ஒன்றுமில்லாத எல்லாம் உள்ளடக்கிய ஆகாயத்தலத்தில் ஞானத்தால் சூட்சமத்தால் யானும் நீயும் கலந்து இருந்த தன்மையை என்னவென்று எடுத்துரைப்பது ஈசனே!!!
    
***************************************************
சித்தர் சிவவாக்கியம் - 324
ஓம் நமோ என்றுளே பாவையென்று அறிந்த பின்
பானுடல் கருத்துளே பாவையென்று அறிந்த பின்
நானும் நீயும் உண்டடா நலங்குலம் அது உண்டடா
ஊணும் ஊணும் ஒன்றுமே உணர்ந்திடா எனக்குளே.
    . 

ஓம் என்பதும் நமசிவய என்பதும் நமக்குள்ளே வாலையாய் அமர்ந்த பாவை என்பதை அறிந்து கொள்ளுங்கள். இப்பாரில் உடல் எடுத்ததும் உயிர் நின்றதும் சக்தியான வாலை என்பதை உங்கள் கருத்துக்குள்ளே கண்டு அறிந்து கொள்ளுங்கள். எல்லா உடம்பிலும் வாலை இருக்கும் வரை நானும் உண்டு, நீயும் உண்டு, நலங்களும் உண்டு, குலங்களும் உண்டு. யாவையும் உண்டு பண்ணி காத்து கரை சேர்ப்பவள் என்பதை உணர்ந்து கொண்டு அவ்வாலை ஒரேழுத்தாக ஊண் பற்றி நின்ற சூட்சும தேகத்தையும் தூல தேகத்தையும் ஒரே நினைவால் ஒன்றாக்கி தியானம் செய்து தனக்குள்ளேயே உணர்ந்திருங்கள்.
     
***************************************************
சித்தர் சிவவாக்கியம் - 325
ஐம்புலனை வென்றவர்க்கு அன்னதானம் ஈவதாய்
நன்புலன்களாகி நின்ற நாதருக்கது ஏறுமே
ஐம்புலனை வென்றிடாது அவத்தமே உழன்றிடும்
வம்பருக்கும் ஈவதும் கொடுப்பதும் அவத்தமே.   .
  . 
ஐம்புலன்களையும் வென்று தியான தவத்தில் இருக்கும் யோகிகளுக்கும் தவசிகளுக்கும் அவர்கள் இருக்கும் இடம் தேடிக் கண்டு அன்னதானம் செய்து தர்மம் கொடுப்பதுவே சிறந்தது. அது நற்புண்ணியமாக அவர்களுக்குள்ளே நின்ற நாதனாகிய ஈசனைச் சேரும். அது நமக்கும் புண்ணிய பலனைக் கொடுக்கும். அதைவிடுத்து ஐம்புலன்களை அடக்கத் தெரியாத காவி வேடம் பூண்டு பிச்சையெடுத்து ஏமாற்றித் திரியும் வம்பர்களை யோகி, ஞானி என எண்ணி அவர்களுக்கு தர்மம் செய்வதும் தானம் கொடுப்பதும் வீணான பாவமே.

***************************************************
http://sivavakiyar.blogspot.com/ நண்பர்களே லிங்கினை அழுத்தி சித்தர் சிவவாக்கியரின் சிந்தனை மற்றும் சிவனைப் பற்றிய 550 பாடல்களை இனிய சந்தத்தில் வேண்டும் பொழுது கேளுங்கள்.  மனதிற்கு மகிழ்வாக இருக்கும்.  மேலும் பயணிப்போம் சித்தர் சிவவாக்கியரின் சிந்தனைகளை தொடர்ந்து, பாட்டுச் சித்தரின் அருளாசியுடன். ..அன்புடன் கே எம் தர்மா.ஓம் நமசிவய நமசிவய ஓம்!!!